Ciclo de cinema: Xabier P. DoCampo na memoria

Ademais de mestre, escritor, contacontos e un incansábel promotor da lingua e a cultura galega e da lectura, Xabier P. DoCampo foi un gran cinéfilo, un deses que non sería quen de contar as horas que na súa vida pasou na escuridade dunha sala. Esta paixón fíxose explícita n’A nena do abrigo de astracán (2018), estruturada en sete capítulos con títulos de películas clásicas, as sete que a nena protagonista ve nas sesións dos domingos e lle serven de refuxio e de aprendizaxe fronte as miserias e crueldades da Galiza da posguerra. Para ela, igual ca para o autor, o cinema é unha xanela ao mundo, mais o cinema, o mellor cinema, fala sempre de nós: axúdanos a entender o que pasa fóra e o que nos pasa por dentro, a comprender e a comprendérmonos. É unha xanela, mais tamén é un espello.

Nunha homenaxe ao autor chairego, pois, o cinema non pode non estar presente. Abre o ciclo A cinta branca de Michael Haneke, que tanto lle gustou e que, no seu estudo das raíces do mal, conecta ben coa que foi a súa novela derradeira. Despois desta, O novato de Rudi Rosenberg, que nunha fermosa recensión Xabier defendeu como “un canto a todos aqueles que, por enriba da taxonomía social que atribúe posicións preasignadas no grupo, recoñécense na súa singularidade e fan dela un camiño de vida, un vieiro cara á felicidade persoal que ten moito que ver cunha certa acracia que debía ser predicada como xeito de vida nos centros escolares”. Admirador como era de Nanni Moretti, é indubidábel o moito que lle había gustar a exultante O sol do futuro, e máis aínda o seu colofón, a revolución da esperanza en forma de desfile festivo. A xeito de peche, Onde está a casa do meu amigo? de Abbas Kiarostami, unha obra maior dun cineasta, tamén para Xabier, de referencia.

Martin Pawley

Onde está a casa do meu amigo? (Abbas Kiarostami, 1987)

CICLO "XABIER P. DOCAMPO NA MEMORIA"

Sala Marilyn Monroe, Fórum Metropolitano, abril de 2024

Venres 5 ás 20:00 e sábado 6 de abril ás 17:30: Das Weisse Band (A cinta branca) de Michael Haneke 

Xoves 11 ás 20:00, venres 12 ás 20:00 e sábado 13 ás 17:30 e 20:00: Le Nouveau (O novato) de Rudi Rosenberg

Xoves 18 ás 20:00,  venres 19 ás 20:00 e sábado 20 ás 17:30 e 20:00: Il sol dell'avvenire (O sol do futuro) de Nanni Moretti

Xoves 25 ás 20:00,  venres 26 ás 20:00 e sábado 27 ás 17:30 e 20:00: Khane-ye Doust Kodjast (Onde está a casa do meu amigo?) de Abbas Kiarostami