Xabier P. DoCampo

Debuxo de Xosé Cobas

Foi un escritor, mestre, actor e narrador oral chairego que naceu o 5 de abril de 1946 en Rábade (Lugo) e morreu o 28 de xuño de 2018 na Coruña. Aos sete meses a súa familia trasladouse a Castro de Ribeiras de Lea (Castro de Rei, Lugo), onde foi por vez primeira á escola. Máis tarde, a súa familia foi vivir á Coruña, onde fixo o bacharelato e estudou maxisterio.

Como mestre traballou en varias escolas, entre elas na Escola Fogar de Santa Margarita, onde foi o titor de prácticas de Agustín Fernández Paz, chairego coma el, co que axiña amizaría. Durante oito cursos traballou no programa Preescolar na Casa e ao longo da súa carreira como mestre sempre estivo relacionado cos movementos de renovación pedagóxica, sendo un dos fundadores de Nova Escola Galega e membro do consello de redacción da Revista Galega de Educación. Escribiu libros de texto de lingua galega e textos sobre a lectura e a utilización educativa da narración oral.

Tamén foi actor e director de teatro, traballou en Radio Nacional de España en Galicia, como escritor de guións e director de programas. Nos últimos anos da súa vida colaborou no programa Un día por diante da Radio Galega. Participou na creación da Asociación Galega do Libro Infantil e Xuvenil (GALIX), da que foi un dos seus primeiros presidentes, e escribiu sempre en galego columnas semanais nos xornais. En 2009 foi un dos fundadores de Prolingua, plataforma  de defensa e promoción da lingua galega. 

Publicou trinta e cinco libros de literatura infantil e xuvenil en galego, traducidos boa parte deles ao castelán, catalán, éuscaro, portugués, asturiano e inglés. Obtivo moitos premios pola súa obra, entre outros, o Premio Nacional de Literatura Infantil e Xuvenil por Cando petan na porta pola noite (1994), o da Biblioteca de Múnic por Bolboretas (2004) e o Premio da Crítica de Galicia e Premio Gala do libro galego por A nena do abrigo de astracán (2017), a súa derradeira novela, escrita para persoas adultas.

Xabier Docampo publicou novelas como O misterio das badaladas (1986), o seu primeiro libro, O pazo baleiro (1997), A casa da luz (2002), O libro das viaxes imaxinarias (2008) ou A illa de todas as illas (2013); contos como Roxelio e a couza (1991) ou Un conto de tres noites (2001); biografías como Breogán (1998); cartas como Catro cartas (2000); álbums como Mans (2011), en colaboración con Daniel Puente, ou O pintor cego (2020), obra póstuma en colaboración con Xosé Cobas, que ilustrou moitos dos seus libros.

 Para saber máis:

 – Autobiografía (febreiro de 2004). 

– Blog de Xabier P. Docampo (Archive.org, 2016).

– Fototeca Xabier P. DoCampo (AELG). 

– Videoteca Xabier P. DoCampo (AELG).

– Artigos de e sobre Xabier P. DoCampo (AELG).

– Por que comecei a escribir?  (Videoteca AELG, 2007)

– Xabier P. DoCampo le un fragmento de O libro das viaxes imaxinarias (Acto de Primavera, outubro de 2018)

– Xabier P. DoCampo fala da súa obra no Culturgal (AELG decembro 2008).

– Xabier P. DoCampo no Lendo contigo (Espazo Lectura, 30 de maio 2009).

– Xabier P. DoCampo fala d'A nena do abrigo de astracán: a novela + o cinema da novela (Acto de Primavera, novembro de 2017).

– Xabier P. DoCampo fala da súa vida (Pixifilms,  fotos e audio, 30 de maio 2019).

– Xabier P. Docampo le un fragmento de Contos de tres noites (Videoteca AELG, 2019).

– Xabier P. DoCampo na voz da amizade (Homenaxe 29 de maio de 2020).

– Ficha autor (Xerais 2024).

– Entrada Galipedia (2024). 

Publicacións populares deste blog

Polavila Docampo 2024

Imaxe
A Polavila Docampo é unha homenaxe pública e itinerante ao mestre e escritor Xabier Docampo, que terá lugar cada ano nunha provincia e cidade distinta, o 5 de abril, coincidindo coa data do seu nacemento. A deste ano é a primeira e celebrarase no Fórum Metropolitano da Coruña (Rúa Río de Monelos, 1). Nela participarán poetas, músicos, narradoras/es orais, cantoras, escritoras e escritores e outras amizades. Por suposto, pode asistir calquera persoa que o desexe. Aquí vos deixamos o programa da xornada do 5 de abril : 18:00- 18:15 horas: apertura da Polavila , da exposición bibliográfica sobre Xabier DoCampo e das adhesións recibidas de bibliotecas escolares, no vestíbulo do Fórum Metropolitano. 18:15 – 19:00 horas: Vouche contar un conto , sesión de contos para público familiar na sección infantil da Biblioteca do Fórum Metropolitano. Require inscrición previa .  19:00 – 19:45 horas: Catro cartas , lectura pública e continuada deste libro a cargo de amizades de Xabier DoCampo, no
Ler máis

Ciclo de cinema: Xabier P. DoCampo na memoria

Imaxe
Ademais de mestre, escritor, contacontos e un incansábel promotor da lingua e a cultura galega e da lectura, Xabier P. DoCampo foi un gran cinéfilo, un deses que non sería quen de contar as horas que na súa vida pasou na escuridade dunha sala. Esta paixón fíxose explícita n’ A nena do abrigo de astracán (2018), estruturada en sete capítulos con títulos de películas clásicas, as sete que a nena protagonista ve nas sesións dos domingos e lle serven de refuxio e de aprendizaxe fronte as miserias e crueldades da Galiza da posguerra. Para ela, igual ca para o autor, o cinema é unha xanela ao mundo, mais o cinema, o mellor cinema, fala sempre de nós: axúdanos a entender o que pasa fóra e o que nos pasa por dentro, a comprender e a comprendérmonos. É unha xanela, mais tamén é un espello. Nunha homenaxe ao autor chairego, pois, o cinema non pode non estar presente. Abre o ciclo A cinta branca de Michael Haneke, que tanto lle gustou e que, no seu estudo das raíces do mal, conecta ben coa que
Ler máis

«Polavila Docampo», columna en «Nós diario»

Imaxe
O editor Antonio Ventura incitou a Xabier P. DoCampo a que escribise un libro sobre o valor da lectura dirixido a persoas mediadoras. Tirando dese fío, Xabier, namorado do xénero epistolar como recurso creativo e de intervención política, escribiu unha das súas obras senlleiras, Catro cartas (Anaya, 2000; Xerais, 2020), na que reflexiona sobre a literatura como emoción compartida e os libros como un espazo de encontro. Dirixidas á amada, ao fillo, á mai e a Tusitala (R.L.S.), cun quinta peza, fóra de catálogo, a quen lese as anteriores, DoCampo reflexiona con lucidez e beleza sobre a lectura (tamén a escritura) como un traxe que lle senta ben a alma e fai a vida máis fermosa. Lectura e escritura, nas súas palabras, que desempeñan a función «de nos axudaren a nos coñecer e recoñecer», «dúas iniciativas individuais que nos axudan a indagar en nós e, ao mesmo tempo, se substancian no outro, por medio da entrega, da xenerosidade e do amor». O vindeiro venres, 5 de abril, ca
Ler máis